Eknath Shinde : सातारा जिल्ह्यातील महाबळेश्वर तालुक्याचे शेतकरी मोठ्या प्रमाणात स्ट्रॉबेरीचे उत्पन्न घेतात. त्यावरच शेतकऱ्यांचे अर्थकारण देखील अवलंबून आहे. शासन शेतकरी हितासाठी स्ट्रॉबेरी पिकाला अनुदान देण्यासाठी प्रयत्नशील आहे. साताऱ्याचे पालकमंत्री शंभूराज देसाई, आमदार मकरंद पाटील यांच्याशी त्यासंदर्भात सविस्तर चर्चा केली जाईल, अशी ग्वाही मुख्यमंत्री एकनाथ शिंदे यांनी दिली आहे.
स्ट्रॉबेरी विथ सीएम या कार्यक्रमाचे आयोजन पाचगणी येथील बिलीमोरिया शाळेच्या सभागृहात करण्यात आले होते. याप्रसंगी मुख्यमंत्री श्री. शिंदे बोलत होते. पालकमंत्री शंभूराज देसाई, आमदार मकरंद पाटील, मुख्य कार्यकारी अधिकारी याशनी नागराजन, अपर जिल्हाधिकारी जीवन गलांडे, टाईम महाराष्ट्रचे मुख्य संपादक राजेश कोचेकर, जिल्हा अधीक्षक कृषी अधिकारी भाग्यश्री फरांदे आदी तसेच या कार्यक्रमास महाबळेश्वर तालुक्यातील स्ट्रॉबेरी उत्पादक शेतकरी मोठ्या संख्येने उपस्थित होते. शेती करीत असताना शेतकऱ्यांना अनेक अडचणींना सामोरे जावे लागते, असे सांगून मुख्यमंत्री श्री. शिंदे म्हणाले, हे शासन सर्वसामान्यांचे, शेतकऱ्यांचे असल्याने या घटकांच्या विकासासाठी आवश्यक सर्व बाबी केल्या जातील. पर्यावरणाचा ऱ्हास रोखण्यासाठी सर्वांनी झाडे लावली पाहिजेत व त्याचे संवर्धनही केले पाहिजे.
नोकरीच्या शोधार्थ शहरात जाणाऱ्यांना स्थानिक पातळीवरच रोजगार उपलब्ध व्हावेत यासाठी शासन पर्यटन वाढीसोबतच रोजगार निर्मितीवर भर देत आहे. त्यासाठी शेतकऱ्यांनी बांबू लागवडीकडे वळावे. बांबू नगदी पीक असून बांबूपासून फर्निचर,इथेनॉल निर्मिती करता येते. बांबू लागवडीसाठी शासन अनुदान देत असून त्याचा लाभ घ्यावा, असे आवाहनही त्यांनी केले. स्ट्रॉबेरीपासून वाईन निर्मितीचा प्रकल्पही महाबळेश्वर येथे उभारण्यात येईल, असेही मुख्यमंत्री श्री शिंदे यांनी यावेळी नमूद केले.
